U.P.R. “Tauleda”
Adr.: Bulevardi Kryesor, Pranë ish Kinema Iliria, Durrës.
Tel/fax: 00355 52 24827, Mob.: 00355 692075571
E.mail: tauleda@hotmail.com, tauleda_dr@yahoo.com
Me
mbështetje të Prefekturës së Qarkut Durrës
"Sviluppo Sistemi Turistici in Albania"
Regione
PromAdria
Marche
-----------------------------
V.A.L.T.-
Valorization of Art,
Language and Tourism
V.A.L.T C
E
Regione
Puglia Provincia
Lecce
Kalaja është e lashtë sa vetë qyteti i Durrësit. Gjatë shekujve ajo është prishur dhe rindërtuar disa herë. Muret rrethuese të Durrësit në pjesën e tyre kryesore i përkasin periudhës së Perandorit Anastas (491-518) me origjinë nga ky qytet dhe përbëhen nga dy pjesë kryesore: Akropoli ose Kështjella e sipërme dhe Kështjella e poshtme.
Në Kështjellën e sipërme kishin selinë e tyre Duka i Durrësit dhe më vonë, kur qyteti qeverisej nga feudalë shqiptarë (1368-1392), aty kishin vendqëndrimin e tyre Karl dhe Gjergj Topia. Akropoli kishte dy porta që e lidhnin me Kalanë e poshtme në lartësinë 59 metra. Kjo kala ka, sipas studimeve, dy periudha ndërtimi, duke marrë formën e një katrori me gjatësi brirësh rreth 500 metra.
Muret janë të rrethuara me kulla të rrumbullakta, katërkëndëshe dhe tetëkëndëshe dhe në mes të mureve janë porta të ndyshme. Shumë e përmendur është “Porta e kalorësit” – porta me hark të thyer pranë Amfiteatrit, ku ishte ngritur dhe një monument i madh prej bronzi i Perandorit Adrian. Kalaja e Durrësit ka qenë shumë e fortë.
Malhu me prejardhje nga Filadelfia e Palestinës shprehet: “Kalaja e Durrësit është e vendosur në një kodër të lartë në përgjithësi të papushtueshme”. Kronistja bizantine Anna Komnena në veprën e vet “Aleksiada” do të shkruajë: “Muri i Kalasë së Durrësit mbahet dhe mbështetet në pirgje. Këto pirgje ngrihen rreth qytetit në një lartësi prej 11 këmbësh, ku sipër tij mund të kalojnë katër a më shumë kalorës krah njëri-tjetrit”. Ndërsa kronistët turq do të shpreheshin se Kalaja e Durrësit “kishte për shok qiellin”, aq të larta ishin muret e saj.
Në kohën e perandorit Anastas, Kalaja e Durrësit ishte rrethuar me tri radhë muresh të fortë. Studiuesit mendojnë se rrethi i tretë i këtyre mureve janë rrënojat e Porto Romanos, pranë të cilave ishte gjithashtu një kantier i vogël ku ndërtoheshin anije të ndryshme.
Përveç Portës së Kalorësit në Kështjellën e Durrësit kanë qenë e përmendur dhe “Porta e madhe”, “Porta e Detit” etj., që quheshin ndryshe dhe “muze në natyrë”. Në muret e tyre kishte të montuara shumë monumente antike, gjurmë të të cilave shihen akoma edhe sot.
