Fushë-Kruja

Fushë-Kruja është njëra nga Bashkitë e Qarkut të Durrësit, e vendosur në udhëkryqin më të rëndësishëm që lidh jugun me veriun e Shqipërisë. Me pak humor, kryetari i Bashkisë thotë se Fushë-Kruja është kërthiza e Shqipërisë, bile këtu bie edhe qendra e gravitetit të saj. Përveç qendrës në këtë bashki përfshihen edhe disa qendra të banuara periferike, nga të cilat më interesantja është Zgërdheshi, vendbanimi dhe ndoshta edhe kryeqendra e të parëve të lashtë të shqiptarëve. Rrugë fare të shkurtëra, brenda 20 e 30 km të çojnë në Tiranë, në Durrës, në Ishëm etj. e fare pak kilometra rrugë të çojnë në Aeroporitn nacional “Nënë Tereza”.
Pjesa më e madhe e njerëzve pa eksperienca të mjaftueshme e lidhin fjalën turizëm me fjalen det. Fushë-Kruja është prova e të kundërtës. Turisti mund të kalojë pushimet jo vetëm pranë detit, por edhe në zona si Fushë-Kruja. Afërsia me qytetet e me qendrat e mëdha historike dhe portat kryesore të hyrjes në Shqipëri, mjedisi i pastër e i qetë, gjelbërimi, peizazhet e larmishëm, gjurmët e historisë së lashtë të Shqipërisë brenda këtij territori, traditat, prodhimet e famshme të artizanatit që njihen mirë edhe në tregjet e huaja, zakonet e veshjet e veçanta të zonës, mikpritja, produktet natyrale të vendit e kuzhina tipike, janë vetëm disa nga elementet që e bëjnë tërheqëse këtë zonë për ta vizituar e për të kaluar ditë pushimi të këndshme në çdo periudhë të vitit.
Shtëpitë janë të pastra e komode për të banuar. Ato janë të zhytura në gjelbërim e lule që janë traditë e amvisave të kësaj zone.